Атырауда браконьерлерден бекіре мен есірткі тәркіленді
Облыстық полиция департаментінің баспасөз қызметінен мәлім еткендей, үш күдіктінің есірткі өнімдері мен бекіре тұқымдас балықтарды заңсыз сақтағаны анықталды.
«Экстремизмге қарсы іс-қимыл басқармасы мен Атырау қалалық полиция басқармасының №1 қалалық бөлімінің қызметкерлері «Браконьер» жедел-профилактикалық іс-шарасы кезінде үш ер адамды анықтап, ұстады. Олардың біріне тиесілі көлік гаражын тінту кезінде салмағы 101 келі қара балық, 20 келі бекіре тұқымдас балықтар түрлері, 7 дана көлемінде есірткіге ұқсас заттар табылды. Бұдан бөлек, күдіктідердің тағы бірінің гаражынан 5 дана моторлы қайық пен тіркелмеген 16 калибрлі екі ұңғылы мылтық табылып, тәркіленді», - деп хабарлады департаменттің баспасөз қызметі.
Қазір айғақты заттармен ұсталған үш күдіктіге қатысты ҚР Қылмыстық кодексінің 339-бабы 1-бөлігімен, 296-бабы 2-бөлігімен сотқа дейінгі тергеу амалдары жүргізіліп жатыр.
Күдіктілердің жасы – 46, 41 және 38-де. Оларға бұлтартпау шарасын қолдану мәселесі шешіліп жатыр.
Еске сала кетелік, бұдан бұрын Атырау облысында браконьерлерден 2,5 тонна балық тәркіленгенін хабарлаған болатынбыз.
Күзгі «Бекіре-2022» іс-шарасы кезінде Балық қорына заңсыз қол сұққан 154 құқық бұзушы ұсталып, олардан 2 тонна 538 келі балық тәркіленді. Оның ішінде 438 келі бекіре тұқымдас балықтар бар. Құқық бұзушылардан 153 балық аулау және 3 су көлік құралдары алынды. ҚР Әкімшілік құқық бұзушылық туралы кодексінің 383-бабымен (Балық аулау қағидаларын бұзу) 143 адам жауапкершілікке тартылды.