Атырауда мұз ойылып, Жайыққа түсіп кеткен екі адамның біреуі құтқарылды
Облыстық төтенше жағдайлар департаментінің қоғаммен байланыс тобынан мәлім еткендей, оқиға бүгін, 5 қаңтарда болған.
Атырау қаласының маңындағы Жұмыскер ауылынан жергілікті уақытпен сағат 11:14-те екі адамның Жайық өзенінің мұзы ойылып, суға түсіп кеткені туралы шақырту түскен.
Оқиға орнына жеткен облыстық полиция департаменті балық қорына қылмыстық қол сұғушылыққа қарсы іс-қимыл бөлімінің инспекторлары, полиция капитаны Жеткіншек Иманғалиев пен полиция аға сержанты Айбат Жауымбаев жедел жеткен.
Олар өзенге батып кеткелі тұрған бір адамды арқанмен ұстап қалған.
«Жедел-құтқару жасағының құтқарушылары мен полиция қызметкерлері Жайық өзеніне түсіп кеткен 1974 жылғы ер адамды құтқарып қалды. Құтқарылған ер адам облыстық ауруханаға жеткізілді», -деп хабарлады департаменттің қоғаммен байланыс тобы.
Қазір Жайық өзеніне түсіп кеткен 1975 жылғы ер адамды су астынан іздестіру жалғасып жатыр.
Авариялық-құтқару жұмыстарына Атырау облыстық төтенше жағдайлар департаментінен 8 құтқарушы, 2 техника мен 1 қайық тартылған.
Еске сала кетелік, бұған дейін Атырауда 8 жасар бала Жайық өзеніне батқан жасөспірімдерді құтқаруға көмектескенін жазған едік.
Бұдан соң достарын судан құтқарған атыраулық оқушы «Жас батыр» атанды.
Фото: Атырау облыстық ТЖД