Атырауда Парламент Мәжілісінің депутаттығына 20 кандидат ұсынылды
Атырау облыстық аумақтық сайлау комиссиясының мәліметіне сүйенсек, алдағы сайлауда Парламент Мәжілісінің депутатына бірмандаттық сайлау округінен 1, ал, әр деңгейдегі 9 мәслихатқа 140 депутат сайланады.
«Атырау облысында Парламент Мәжілісі және мәслихат сайлауына ұсынылған барлық кандидаттың саны – 496. Парламент Мәжілісі депутатын сайлау жөніндегі №13 бірмандаттық сайлау округіне 20 кандидат ұсынылды. Оның ішінде өзін-зі ұсынған 16 кандидат бар. Төрт кандидат – Аmanat, Ақжол, Ауыл, ЖСДП партияларының өкілдері», -деп хабарлады аумақтық сайлау комиссиясынан.
Парламент Мәжілісінің депутаттығына өзін-өзі ұсынған кандидаттардың арасында бір зейнеткер мен 3 жұмыссыз бар.
Кандидаттардың басым бөлігі басшылық қызметте істейді.
Кандидаттардың біреуі бұрын Парламент Сенатының, тағы біреуі Парламент Мәжілісінің депутаты болған.
Екеуінің мамандығы – заңгер, қазіргі әл-Фараби атындағы ҚазҰУ-дің түлегі. Бұрынғы депутаттардың екеуі де өзін-өзі ұсынған.
Кандидаттардың арасында Атырау қаласының бұрынғы әкімі де бар. Ол да өзін-өзі ұсынып отыр.
Еске сала кетелік, бұған дейін бұдан бұрын Атырау облысында әр деңгейдегі мәслихаттарға 140 депутат сайланатынын хабарлаған едік.
«Атырау облыстық мәслихатының 30 депутатының 50% (15 депутат) мажоритарлық жүйе бойынша, 50% (15 депутат) партиялық тізімдермен сайланады. Ал, Атырау қалалық мәслихатының 25 депутаты, аудандардың мәслихаттарының 85 депутаттары толықтай мажоритарлық жүйемен сайланады», -деп хабарлаған еді аумақтық сайлау комиссиясынан.