Атырауда Трамадол сатып жүрген әйел ұсталды
Атырау облыстық Полиция департаментінің бастығы Қамза Үмбетқалиевтің айтуынша, 29 қарашада «Дәрмек» іс-шарасы кезінде дәріні заңсыз сатқан тұрғын анықталған.
«Есірткі қылмысына қарсы іс-қимыл басқармасының қызметкерлері Атырау қаласындағы Алтай көшесінде 1977 жылы туған азаматшаны ұстады. Оның 100 дана Трамадол мен 63 дана Трапикамед дәрі-дәрмектерін заңсыз сатып жүргені белгілі болды.
Қазір ұсталған азаматшаға қатысты ҚР Әкімшілік құқықбұзушылық туралы кодексінің 426-бабымен (Фармацевтикалық қызметтің және дәрілік заттардың, медициналық мақсаттағы бұйымдар мен медициналық техникалық айналысы саласының қағидаларын бұзу) толтырылған іс-құжаттары Медициналық және фармацевтикалық бақылау комитетінің облыстық департаментіне шешім қабылдау үшін жолданды», - дейді Қамза Үмбетқалиев.
Еске сала кетелік, бұдан бұрын Атырау облысының тұрғыны 1 келіге жуық есірткімен ұсталғанын жазған едік.