Атырауда туберкулез жұқтыру азайып, коронавирусқа шалдығу 4 есе өсті

АТЫРАУ. ҚазАқпарат – Атырауда туберкулез жұқтыру азайып, соңғы екі аптада коронавирус инфекциясына шалдығу төрт есе өсті, деп хабарлайды ҚазАқпарат.

Облыстық денсаулық сақтау басқармасының басшысы Асхан Байдуәлиевтің мәліметінше, өңірде өлім көрсеткіші өткен жылмен салыстырғанда 8,3%-ға төмендеген.

«Биылғы жылғы бес айда денсаулық сақтау саласында кей көрсеткіштердің оң динамикасы байқалады. Атап айтсақ, туберкулез дертінен болатын өлім 44,4%-ға, ал аталған аурумен сырқаттанушылық 18,5%-ға төмендеді. Қатерлі ісікке шалдыққандар арасындағы өлім 9,7%-ға, сырқаттанушылық 8,9%-ға төмендеп отыр. Қан айналымы жүйесі сырқатымен ауыратындардың өлімі 4%-ға азайды. Алайда, қан айналымымен сырқаттанушылық 12,4%-ға өсіп отыр», -дейді Асхан Байдуәлиев.

Оның дерегіне сүйенсек, Атырау облысында соңғы екі аптада Covid-19 инфекциясына шалдығушылар саны төрт есеге өскен.

«Коронавирус инфекциясының қайта өршуіне байланысты Атырау облысында 333 инфекциялық төсек-орын ашылды. Жансақтау бөлімінде 33 төсек-орын жасақталды. Биылғы 19 шілдедегі жағдайымен инфекциялық стационарда 33 науқас ем алып алып жатыр. Оның ішінде №2 облыстық ауруханаға 28 науқас түсті. Жансақтау бөлімінде 1 науқас ем-дмо қабылдау үшін оқшауланды. Ал, Жылыой аудандық орталық ауруханадағы инфекциялық стационарда 4, Құрманғазы ауданындағы осындай аурухананың инфекциялық стационарында 1 науқас емделуде. Жалпы инфекциялық стационарлардағы төсек-орын жүктемесі 9,9%, жансақтау бөлімінің төсек-орын жүктемесі 3,0%-ды құрап отыр», -деді Асхан Байдуәлиев.

Қауіпті вирусты жұқтырған 272 науқас өз үйінде ем-дом қабылдауға жіберілген.

Еске сала кетелік, бұған дейін Атырау облысында коронавирус жұқтырушылар көбейіп бара жатқанын хабарлаған болатынбыз.