Атырауда түн жарымында көшеде жүрген 100-ге жуық бала полицияға жеткізілді
Облыстық полиция департаменті баспасөз қызметінің мәліметінше, 21-23 сәуірде «Жанұя және бала» жедел профилактикалық іс-шарасы өткізілген.
«Іс-шара кезінде бала тәрбиесімен тиісінше айналыспаған 8 отбасына қатысты құжаттар кәмелетке толмағандардың құқығын қорғау жөніндегі комиссияға жолданды. «Зорлық және жауапкершілік» тақырыбында онлайн форматта 110 ата-ананың қатысуымен жиналыс өткізілді. Департаменттің бөлім бастықтары 7 азаматқа құқықтық консультация беріп, кәмелетке толмаған 22 жасөспіріммен әңгіме жүргізілді», -дейді департамент бастығы, полиция бастығы Қамза Үмбетқалиев.
Оның айтуынша, ювеналды полиция инспекторлары түнде заңды өкілінсіз тұрғылықты үй-жайынан тыс жерде жүрген 98 жасөспірімнің ата-анасына әкімшілік ескерту берілген.
Ал, 11 ата-анаға бала тәрбиесімен айналыспағаны үшін әкімшілік хаттама толтырылып, сотқа жолданған.
Еске сала кетелік, бұған дейін Атырауда балаларының көзінше ішімдік ішкен әйелдің құқығы шектелетінін жазған болатынбыз.