Атырауда Жайық өзенінің үстіндегі көпірдің бірі жабылады
АТЫРАУ. ҚазАқпарат – Атырау қаласында Жайық өзенінің үстіндегі көпірдің бірі жабылады, деп хабарлайды ҚазАқпарат.
Атырау қалалық әкімдігі баспасөз қызметінің мәліметіне сүйенсек, 13 тамызда жөндеу жұмыстарына байланысты «Балықшы-Жұмыскер» бағытындағы көпірде автокөлік қозғалысын тоқтату көзделген.
«Жөндеу кезінде көпір құрылымының деформациялық қосылыстарын демонтаждау және ауыстыру, сондай-ақ, қозғалыс қауіпсіздігін қамтамасыз ету мақсатында шұңқырларды жамау жоспарланып отыр. Қайта жаңарту жұмыстарына байланысты Құнанбаев көшесінен бастап «Балықшы-Зарослый» бағытымен қатынайтын тас жолда автокөлік қозғалысы тоқтатылады. Осы орайда, автокөлік жүргізушілері қала жолдарында кептеліс тудырмау үшін қозғалыс бағытын алдын ала жоспарлауы қажет» -деп хабарлады әкімдіктің баспасөз қызметі.
Еске сала кетелік, бұдан бұрын көпжылғы ағаштар тамырымен көшірілгенін жазған болатынбыз.
