Атыраудың тұрғыны 90 дана психотропты дәріні заңсыз сатпақ болған
АТЫРАУ. ҚазАқпарат – Атыраудың тұрғыны психотропты дәрінінің 90 данасын заңсыз сатпақ болған, деп хабарлайды ҚазАқпарат.
Облыстық полиция департаменті баспасөз қызметінің ақпаратына қарағанда, «Дәрмек» профилактикалық іс-шара кезінде психотропты дәрілерді сатушы анықталған.
«Атырау қаласындағы «Вокзал маңы» шағын ауданында 38 жастағы 50 трамадол, 40 трапикамед дәрі-дәрмегін заңсыз сатып жүрген жерінен ұсталды. Осы дерекке байланысты жинақталған іс-құжаттар Медициналық және фармацевтикалық бақылау комитетінің Атырау облысы бойынша департаментіне шешім қабылдау үшін жолданды» -деп хабарлады департаменттің баспасөз қызметі.
Еске сала кетелік, бұған дейін 36 жастағы әйел трамадол дәрісінің 60 данасын заңсыз сатқанын жазған болатынбыз.
