Атыраулықтар әлем чемпионын күтіп алды

25-27 қазан күндері Чили елінің Сантьяго қаласында каратеден жастар арасындағы XI Әлем чемпионатында Әбілмансұр Батырғали алтыннан алқа тақты.

«Бұл Атырау спортындағы тарихи оқиға. Атыраулық спортшылардың Олимпиадалық спорт түрлері бойынша жастар арасындағы әлем чемпионатында еншілеген алғашқы алтын медалі. 96 мемлекеттен 1500-ден астам спортшы қатысқан додада спортшымыз үздік атанып, ел абыройын асқақтатты», - дейді облыстық Дене шынықтыру және спорт басқармасының бөлім басшысы Нұржауған Төлеуова.

Атыраулық спортшы, жасөспірімдер Олимпиадасы ойындарының жүлдегері, Азия чемпионы Әбілмансұр Батырғали 67 келі салмақта сынға түсіп, барлық алты қарсыласынан басым түсті. Бұл салмақта 60 ел өкілдері өзара мықтыны анықтады. Әуежайдан шыққан бойда Әбілмансұрдың оқу орны, Х.Досмұхамедов атындағы университетте баспасөз маслихаты өтті. Онда Әбілмансұр жарыстан алған әсерімен бөлісті. «Бұл үлкен жеңістердің бастамасы ғана. Алдағы уақытта ересектер арасында әлем және Олимпиада шыңын бағындыру үшін еңбектенетін боламын. Ерінбей, үнемі дайындықта болған спортшы үшін алынбас қамал жоқ», - дейді Әбілмансұр.