Атыраулықтар «Менің Туым. Менің елім!» челленджіне қолдау білдірді
АТЫРАУ. ҚазАқпарат –Атырау қаласының жастары «Менің Туым. Менің елім!» челленджіне қолдау білдірді, деп хабарлайды ҚазАқпарат.
Елімізде қолға алынған республикалық челленджді қолдауға 20-дан астам волонтер қатысты. Олар алдымен «Нұрсая» шағын ауданындағы 17А мекенжайындағы көпқабатты үйдің балконы мен терезесіне мемлекеттік рәміздің бірі – мемлекеттік Туды іліп қойды.
«Бүгін атыраулық жастар елге, Отанға деген сүйіспеншілікпен осы акцияға қолдау білдіруді ұйғардық. Біздің арамызда оқу орындарының белсенді студенттері де бар. Көпқабатты үйдің балконында Тәуелсіздігіміздің символы – көк Туымыз желбіреп тұр. Мұндай сәт әр азаматқа патриоттық рух беріп, ерекше сезімге бөлейді. Басты тілегіміз – көк байрағымыз көкте желбірету. Отанын шын сүйетін патриот жастар еліміздің өркендегенін, тәуелсіздігіміздің мәңгілік болғанын қалайды», - дейді волонтер Илияс Үсенғалиев.
Аталған акция Т.Жұмағалиев көшесіндегі №23, Б.Құлманов көшесі, 112/1 мекенжайындағы көп қабатты үйлерде, «BELUGA» қонақүйінде жалғасты.
