Ауа райының қолайсыздығына байланысты бірқатар өңірде жолдар жабылды
АСТАНА. KAZINFORM – Еліміздің бірқатар өңірінде ауа райының күрт нашарлауына байланысты республикалық маңызы бар автожолдарда қозғалысқа уақытша шектеу енгізілді, деп хабарлайды «ҚазАвтоЖол» ұлттық компаниясы.
27 ақпанда боран мен көктайғаққа байланысты келесі бағыттарда барлық көлік түрлері үшін қозғалыс шектелді.
Қызылорда облысында «РФ шекарасы – Мәртөк – Ақтөбе – Қарабұтақ – Қызылорда – Шымкент – Тараз – Қордай – Алматы – Қорғас – ҚХР шекарасы» автожолының 1362-1646 шақырымы аралығында (Арал қаласы – «Оазис» сервис нысаны), сондай-ақ осы жолдың 1806-2047 шақырымы (Қызылорда қаласы – Бесарық ауылы) жабылды.
Бұдан бөлек, «Қызылорда – Жезқазған – Қарағанды – Шідерті» (KAZ14) автожолының 12-216 шақырымы (Қызылорда қаласы – Ұлытау облысының шекарасы) учаскесінде шектеу қойылды.
Жамбыл облысында аталған халықаралық дәліздің 159-238 шақырымы (Кенен ауылы – Қайнар ауылы) жабылды. Қозғалыс ескі Қордай асуы арқылы жүзеге асырылады.
Шығыс Қазақстан облысында «Өскемен – Риддер – РФ шекарасы» (15-105 км), «Алматы – Талдықорған – Өскемен – Шемонаиха – РФ шекарасы» жолының бірнеше учаскесі (1104-1191 км, 1194-1212 км, 1013-1062 км), «Өскемен – Алтай – Үлкен Нарын – Катонқарағай – Рахман қайнары» (7-249 км), сондай-ақ «Өскемен – Семей» (12-103 км) бағыттарында қозғалыс шектелді.
Абай облысында «Алматы – Талдықорған – Өскемен – Шемонаиха – РФ шекарасы» автожолының 971-1013 км және 778-967 км аралығы, «Өскемен – Семей» (103-198 км), «ҚХР шекарасы – Майқапшағай – Зайсан – Қалбатау – Семей – Павлодар – РФ шекарасы» (756-906 км), «Семей – РФ шекарасы» (2-113 км), сондай-ақ «Қарағанды – Аягөз – Тарбағатай – Богас» (528-941 км) учаскелерінде қозғалыс тоқтатылды.
Ұлытау облысында «Қызылорда – Жезқазған – Қарағанды – Шідерті» (KAZ14) автожолының 216-424 шақырымы (Қызылорда облысының шекарасы – Жезқазған қаласы) жабылды.
Ал Жетісу облысында «Алматы – Талдықорған – Өскемен – Шемонаиха – РФ шекарасы» автожолының 213-234 км (Мұқыры асуы – Жамбыл ауылы) және 276-388 км (Талдықорған қаласы – Жансүгіров ауылы) учаскелерінде қозғалыс қайта ашылды.
Бұған дейін синоптиктер 28 ақпанда бірқатар өңірде дауылды ескерту жариялағаны хабарланған болатын.
