Ауа райы: Бүгін еліміздің басым аймағында бұрқасын болады
АСТАНА. ҚазАқпарат - Қазақстанның басым бөлігінде атмосфералық ағымардың өтуіне байланысты бұрынғысынша ауа райы тұрақсыз болады және қар жаууы да мүмкін, деп хабарлайды ІІМ ТЖ комитетінің баспасөз қызметі.
Кей жерлерде тұман түсіп, көктайғақ болып, жел күшейеді. Ақмола, Павлодар, Қарағанды, Қостанай облыстарының кей жерлерінде желдің күші секундына 15-20 метрге жетеді. Жамбыл облысының бірқатар аймақтарында тұман түсіп, жел секундына 15-20 метр жылдамдықпен соғады, кей жерлерде ол 23 метрге дейін жетуі мүмкін.
Шығыс Қазақстан облысының кейбір жерлерінде төменнен бұрқасын соғып, тұман түсіп, көктайғақ болып, желдің күші секундына 15-20 метрге жетеді, арасында 25 метрге жететін кездері болады.
Солтүстік Қазақстан облысында кей жерлерде тұман түсіп, бұрқасындатып, желдің күші секундына 15-20 метр болады.
Қызылорда облысында тұман түсіп, көктайғақ болады. Оңтүстік Қазақстан облысының кей жерлерінде тұман түсіп, түнде және күндіз желдің күші 15-20 метр-секундқа дейін күшейеді.
Маңғыстау облысында кей жерлерде көктайғақ болып, күндіз төменнен бұрқасын соғады. Ақтөбе облысында кей жерлерде көктайғақ болады. Алматы облысының Жалаңашкөл ауданы аймағында жел секундына 20-25 метрге дейін күшейеді, кей жерлерде желдің күші секундына 30 метрге дейін жетуі мүмкін. Кей аймақтарда тұман түседі.
