Аудан мен ауылға жұмысқа барған мамандарға берілетін жәрдемақы мөлшері өседі

АСТАНА. ҚазАқпарат – Еңбек және халықты әлеуметтік қорғау министрлігі «Ауылдық елді мекендерге жұмыс істеу және тұру үшін келген мамандарға әлеуметтік қолдау шараларын ұсыну мөлшерін айқындау туралы» бұйрық-жобасын әзірледі, деп хабарлайды ҚазАқпарат тілшісі.

Құжатта жазылғандай, енді ауылдық елді мекендерге жұмыс істеу және тұру үшін барған мамандарға мына мөлшерде жәрдемақы беріледі:

- көтерме жәрдемақы – 100 АЕК-тен (345 000 теңге) аспайды;

- тұрғын үй сатып алу немесе салуға әлеуметтік қолдау үшін бюджеттік кредит - аудан орталықтарына келген мамандар үшін 2500 АЕК-тен (8 625 000 теңге) аспайды;

- ауылдық елді мекендерге келген мамандар үшін 2 000 АЕК-тен (6 900 000 теңге) аспайды.

«Осы бұйрықтың 1-тармағының 2 тармақшасы 2024 жылғы 1 қаңтарға дейін мынадай редакцияда қолданылады деп белгіленсін:

- тұрғын үй сатып алу немесе салуға әлеуметтік қолдау үшін бюджеттік кредит – 1 500 АЕК (5 175 000 теңге) аспайды», - делінген Ашық НҚА порталында жарияланған министр бұйрығында.

Яғни, келер жылға дейін аудандар мен ауылдарға барған жас мамандарға үй алу үшін 5,1 млн теңге берілсе, 2024 жылдың 1 қаңтарынан бастап бұл сома ауданда 8,6 млн, елді мекендерде 6,9 млн теңге болып бекітілмек.