«Ауди» жүргізушісі жол апатынан кейін қарсыласын балтамен жарақаттап, оның «Фольксвагенін» кескіледі
АСТАНА. ҚазАқпарат - Мәскеу қаласының солтүстік-батысында «Ауди» көлігінің жүргізушісі жол-көлік апатынан кейін екінші көліктің иесіне балта ала ұмтылып, оның «Фольксвагенін» кескілеп тастады.
«Интерфакс» агенттігіне сәрсенбі күні РФ ІІМ астаналық МБ-нан хабарлағандай, сейсенбі күні кешке 46 жастағы ер адам полицияға сағат 22:00 шамасында Генерал Белобородов көшесіндегі 14-ші үйдің қасында «Фольксваген Трасспортер» және шамаланып отырғандай, «Ауди» көлігінің қатысуымен жол-көлік апаты орын алғанын хабарлады.
Арызданғанның айтуынша, жол апатынан кейін «Ауди» жүргізушісі көлігінің ішінен балта алып шығып, екінші көлікті кескілей бастаған. Сондай-ақ екінші көліктің иесін де жарақаттап, одан кейін оқиға орнынан қашып кеткен.
«Фольксвагеннің» 30 жастағы жүргізушісі қолының жарақатымен ауруханаға жеткізілді. Қазіргі кезде полиция бұзақыны іздеу жұмыстарын жүргізіп жатыр.
