Әуезов театрына «Ұлттық» мәртебесі берілді
«Сүйінші хабар! Қазақстан Республикасының Президенті Қасым-Жомарт Тоқаевтың арнайы жарлығымен Әуезов театрына «Ұлттық« мәртебесі берілді. Енді М.Әуезов атындағы Қазақ Ұлттық академиялық драма театры атандық. Қазақ театрының қара шаңырағы - Әуезов театрының 95 жылдық тарихы бар. Театр өнерінің корифейлерінің ізі қалған өнер ұжымын бүгінгі жетістігімен шын жүректен құттықтаймыз!», - делінген театрдың Instagram парақшасында жарияланған ақпаратта.
М.Әуезов атындағы Қазақ мемлекеттік академиялық драма театры – тұңғыш ұлттық мәдени-сахналық ұжым. 1925 жылдың соңында сол кездегі астанамыз Қызылордада ұйымдастырылды. Театр шымылдығы ресми түрде 1926 жылы 13 қаңтарда М.Әуезовтің «Еңлік-Кебек» трагедиясымен ашылды. 1929 жылы театр труппасы жаңа астана Алматыға қоныс аударды. 1937 жылы академиялық театр атағын алды. Ал 1961 жылы өнер ұжымына көрнекті жазушы-драматург М.Әуезов есімі берілді.