Australian Open: Анна Данилина жұптық сында жартылай финалға шықты

НҰР-СҰЛТАН. ҚазАқпарат - Қазақстанның жұптық сындағы бірінші ракеткасы Анна Данилина Аустралия ашық чемпионатының жартылай финалына шықты, деп хабарлайды ҚазАқпарат тілшісі.

Қазақстандық теннисші бразилиялық Беатрис Хаддад Майямен бірге ширек финалда швециялық Ребекка Петерсон - ресейлік Анастасия Потаповамен шеберлік байқасты.

Бірінші партияда швециялық- ресейлік жұп басымдылық танытты - 6:4.

Екіншісінде Анна мен Беатрис есе қайырды - 7:5. Сосын үшінші, шешуші сетті жеңіспен тәмамдады - 6:3.

Тартысты өткен бәсеке 2 сағаттан астам уақытқа созылды.

Анна мен Беатрис финалға шығу үшін жапониялықтар Сюко Аояма - Ена Шибахарамен таласады.

Еске сала кетейік, бұдан бұрын Қазақстан - Норвегия матчы хард төсенішінде өтетінін жазған болатынбыз.