Аустралияда Конфуций институттары жабылып жатыр

АСТАНА. KAZINFORM – Аустралияда алты университеттің жанындағы Конфуций институттары жабылды. Бұл туралы Lianhe Zaobao басылымы хабарлады. 

Басылымның жазуынша, кейінгі жылдары Аустралия үкіметі Конфуций институттарына бақылауды күшейткен. Сынаушылар Конфуций институттары академиялық еркіндікті шектеумен бірге, Қытай билігінің университеттердің оқу бағдарламасына теріс ықпал етуіне мүмкіндік тудырады деп жазғырады.

Белгілі болғандай, Мельбурн университеті, Квинсленд университеті, Жаңа Оңтүстік Уэльс университеті (UNSW) және Батыс Австралия университеті (UWA) Конфуций институтын бірлесіп басқару туралы Қытай жоғары оқу орындарымен жасалған келісімшарттардың мерзімі аяқтаған соң, тиісті келісімді ұзартпауға шешім қабылдаған.

Аделаида университетінің жанындағы Конфуций институтының да жабылғаны туралы ақпарат тарады. Алайда университет басшылығы бұл жайында ресми мәлімдеме жасаудан бас тартты. 

Роял Мельбурн технологиялық институты (RMIT) Конфуций институтын 2021 жылы жапқан болатын. 

Қазіргі уақытта Аустралияда жеті Конфуций институты жұмысын жалғастырып жатыр. Сидней университеті өз жанындағы Конфуций институтының әлі де ашық екенін, бірақ Қытайдан қаржылай қолдау алмайтынын мәлімдеді. Институт негізінен үздіксіз білім беру орталығы арқылы қоғамға қытай тілі курстарын ұсынады. Квинсленд технологиялық университеті тиісті мәселенің келесі жылы қайта қаралатынын айтты.