Ауыл шаруашылығын субсидиялау: әлеуметтік желі чаттары құрылды

АСТАНА. ҚазАқпарат – Елімізде ауыл шаруашылығы саласын субсидиялау мәселелеріне қатысты әлеуметтік желіде жұмыс чаттары құрылып, одан бөлек «бір терезе» қызметі іске қосылды. Бұл туралы Ауыл шаруашылығы министрінің орынбасары Бағлан Бекбауов мәлім етті, деп хабарлайды ҚазАқпарат тілшісі.

«Ақпараттық жүйені іске қосқан кезде техникалық ақау болды. Жалпы ақпараттық жүйелер сатыға бөлінеді, сол сатыдан өту кезінде кемшіліктер болды. Бірақ біз оларды түзеп, жөнге келтірдік. Қазір әр субсидия бойынша бөлек чат (әлеуметтік желі чаты) құрдық. Жалпы саны 8 чат бар, онда өте көп сұрақтар келіп жатыр. Кейбірінің сұрағына жауап берілмей жатқан жағдайларда бар, оны білеміз. Сол үшін де біз ауыл шаруашылығына қатысты әр субсидияға арнап бөлек чат аштық», - деді Бағлан Бекбауов Мәжілістің аграрлық мәселелер комитетінің отырысында.

Вице-министрдің айтуынша, әлеуметтік чатқа келіп түскен сауалдар бойынша консультациялық көмек көрсетіліп жатыр.

«Сонымен қатар арнайы топ құрып оларды өңірлерге жібердік. Қазір олар Түркістан облысы, Алматы, Қызылорда, Жамбыл облысы және Шымкент қаласында жүр. Субсидия бойынша өтінімін портал арқылы бере алмаған азаматтар жергілікті әкімдікке, ауыл шаруашылығы басқармасына немесе мәселесін әлеуметтік желіде көтеріп жүр. Осының алдын алу үшін біз «бір терезе» қызметін құрып отырмыз. Яғни фермерлерге сол жерде кеңес беріледі. Осы аптаның аяғына дейін еліміздің оңтүстік өңірлерін қамтып, келесі аптада басқа да өңірлерде құрылады», - дейді ол.