Ауыл шаруашылығындағы кәсіпкер басшылардың 31 пайызы - әйелдер
НҰР-СҰЛТАН. ҚазАқпарат – Қазақстандағы ауыл шаруашылығының өнімін өндіруші жеке кәсіпкер басшылардың 31,3% - әйелдер. Finprom.kz ресурсы осы салаға маманданған заңды тұлғалардың құрылымына талдау жасады, деп хабарлайды ҚазАқпарат тілшісі.
Finprom.kz ауыл шаруашылығында нақты жұмыс істеп жүрген заңды тұлғалардың саны маусым айының аяғында 17 мың құрылыммен толыққанын жазады.
Бұл былтырғы кезеңмен салыстырғанда 6,7% көп деген сөз.
Алайда жұмыс істеп тұрған шаруа қожалықтары мен фермерлік шаруашылықтардың саны 1% ғана өсіп, 221,8 мыңға жетіп отыр.
«Жеке кәсіпкерлік саласындағы ауыл шаруашылығының өнімін өндіруші ұйымдардың әйел басшыларының үлесі 31,3% болып отыр.
Бұл көрсеткіш шаруа қожалықтары мен фермерлік шаруашылықтарда – 25,8%, заңды тұлғаларда –17,2%.
Өңірлер бөлінісін алып қарасақ, маусым айының қорытындысы бойынша агроөнеркәсіп кешенінде жұмыс істеп тұрған заңды тұлғалардың жартысынан астамы 20 аймақтың бесеуінде ғана шоғырланған: Түркістан (3,6 мың), Ақмола (1,9 мың), Солтүстік Қазақстан (1,4 мың), Алматы (1,2 мың) және Қостанай (936) областары»,- деп жазады Finprom.kz.
Айта кетсек, ҚР Ауыл шаруашылығы министрі Ербол Қарашөкеевтің айтуына қарағанда, биыл форвардтық сатып алу бағдарламасы аясында Азық-түлік келісім-шарт корпорациясына бөлінген 100 млрд теңгенің 80 пайызы игерілген.
