Ауыл тұрғыны 4 млн теңге несие уәде еткен алаяққа алданып қалған
ТҮРКІСТАН. ҚазАқпарат – Түркістан облысында алаяқ жергілікті тұрғынға «4 млн теңге несие алып беремін» деп, алдап кеткен. Өздігінен ақшасын қайтара алмаған ол полицияға арызданған, деп хабарлайды ҚазАқпарат тілшісі.
Облыстық ПД баспасөз қызметінің мәліметінше, қазығұрттық тұрғын 4 млн теңге несие алып беруге уәде еткен адамға 210 мың теңге бергенін айтқан. Қомақты ақшаны алған соң, ол ізін суытқан.
Күдіктіні ұстау мақсатында жедел-тергеу тобы құрылып, ақпарат көздері арқылы оның тұлғасы анықталған. Нәтижесінде тұрып жатқан мекенжайы бойынша ұсталды. Кінасын толық мойындаған. Сот шешімімен ол «ешқайда кетпеу туралы» қолхатпен босатылды.
«Қазіргі таңда ҚР ҚК-нің 190-бабы «Алаяқтық» бойынша тергеу амалдары жүргізілуде. Күдіктінің бұдан да басқа қылмыстық оқиғаларға қатыстылығы анықталуда», - деді полицияда.
