Ауыр атлетикадан Қызылорда облысы 3 дүркін ҚР Жастар спорт ойындарының жеңімпазы атанды

ҚЫЗЫЛОРДА. ҚазАқпарат - Оңтүстік Қазақстан облысы Шымкент қаласында Қазақстан Республикасының 4-ші Жастар спорт ойындары аясында ауыр атлетикадан жарыс өтті. Бұл туралы ҚазАқпарат ХАА тілшісі облыстық спорт басқармасына сілтеме жасап хабарлады.

Айтулы жарыста Қызылорда облысының ерлер құрама командасы 180 ұпаймен жалпыкомандалық есепте 1-орынды жеңіп алып, 3 дүркін спорт ойындардың жеңімпазы атанды.

Жекелей есепте 56 келі салмақ дәрежесінде өнер көрсеткен Ерасыл Ергенбай спорт ойындарының алтын жүлдесін иеленді. 85 келіде Аят Әмірбеков пен +105 келіде Мейіржан Молдағали күміс, 77 келіде Арыстанбек Жақанша қола жүлделерді еншіледі.

Қыздар арасында 90 келіде Гүлназ Шәмиева 2-орынға ие болды.

Арыстанбек Жақанша мен Евгений Ломанов маусым айында Токиода (Жапония) ауыр атлетикадан жастар арасында өтетін Әлем чемпионатына, Аят Әмірбеков қыркүйек айында Ашхабадта (Түркіменстан) болатын Азия ойындарына қатысады.