Австралиялық отбасы 2014 жылы болған Malaysia Airlines ұшақтарының екі апатында туыстарынан айырылды
АСТАНА. ҚазАқпарат - Австралиялық Ирен мен Джордж Барроуздар 2014 жылы болған Malaysia Airlines ұшақтарының екі апатында да отбасы мүшелерінен айырылып отыр, деп хабарлайды The Independent.
Олардың баласы мен келіні биыл көктемде Үнді мұхитында із-түссіз жоғалып кеткен MH370 ұшағында болған. Кейін олардың немересі өзінің күйеуімен бірге 17 шілде күні Украинада апатқа ұшыраған Амстердам - Куала-Лумпур бағытындағы MH17 ұшағы құрбандарының тізіміне енді. Отбасында осындай қайғыны бастан кешкен қарт жұбайлар БАҚ өкілдеріне сұхбат беруден бас тартып отыр. Айта кетейік, ұшақтың бортында 28 австралиялық болғандығы анықталды. Әуе апатынан қаза тапқан кісілердің тізімінде Ирен мен Джордж Барроуздардың туыстары енген. "Боинг" ішінде жалпы 283 адам болды.
