Автобус құрдымға құлаған Майқайың кентіндегі кәсіпорындар бюджетке қандай пайда әкеліп отыр
ПАВЛОДАР. KAZINFORM — Майқайың — ерекшелігі басым елді мекен. Ерекше дейтіні сол, 9 мыңнан аса халықтың берекесіне айналған әлемге әйгілі алтын кеніші осында орын тепкен. Биыл Майқайыңның, ондағы тау-кен өндірісінің алғаш өз алдына құрылғанына 92 жыл толады.
Майқайың өз алдына елді мекен болғалы оның экономикасы жерасты байлығына тәуелді. Алтын кеніші жергілікті халықты асырап отыр.
«Майқайыңалтын» акционерлік қоғамы Ертістің Павлодар өңіріндегі ең алғаш құрылған тау-кен өндірісі екенін де атап өткен абзал. Ондағы кенішке тұңғыш экскаватор 1940 жылы түсірілген екен. Ол бумен жұмыс істейтін еді. Бүгінде кәсіпорынға екі кеніш және кен-байыту фабрикасы қарайды. Жергілікті халықтың дені бүгінде алтын өндірісінде еңбек етеді.
— Майқайың кентінің әкімшілік аумағына Майкөбе, Сұлужон, Үшқұлын, Шөптікөл ауылдары кіреді. Бүгінде кент пен оған қарасты ауылдарда «Майқайыңалтын» АҚ-нан бөлек, пайдалы қазбалар өндірумен 5 бірдей кәсіпорын айналысады. Олар — көмір өндіретін «Майкубен Вест» акционерлік қоғамы, «Қазақстан алюминийі» АҚ филиалы — «Керегетас» кеніші, «Майқайың ақтас өндіру зауыты» ЖШС, «Пневмосоққыш бұрғылау» ғылыми өндірістік кәсіпорны» ЖШС, «IBM Gold» ЖШС, - деп атап көрсетті Баянауыл ауданының әкімі Ардақ Кісентаев Kazinform агенттігінің тілшісіне берген жауабында.
Былтыр «Майқайыңалтын» АҚ аудандық бюджетке 840 млн 714 мың теңге салық төлеген. Ең үлкен салық төлеуші — «Майкубен Вест» АҚ, өткен жылы бұл өндіріс орны жергілікті қазынаға 1 млрд 681,3 млн теңге қаржы құйған.
Сонымен қатар, жерді пайдаланғаны үшін 2023 жылы келесідей қосымша салық төленген:
— «Майқайыңалтын» АҚ — 6 млн 739 мың теңге;
— «Майкубен Вест» АҚ — 46 млн 314 мың теңге;
— «Керегетас» кеніші — 8 млн 329 мың теңге;
— «Пневмосоққыш бұрғылау» ЖШС — 1 млн 531 мың теңге;
— «Гравелит» ЖШС — 192 мың теңге.
Соңғы аталған екі кәсіпорын жергілікті кәсіпкер Тимур Қабдуловқа тиесілі. Ол — «Майқайыңалтын» АҚ бас директорының кеңесшісі Орынжан Қабдуловтың ұлы.
