Ай сайын әлемде екі тіл жоғалады
НЬЮ-ЙОРК-ПАРИЖ. Ақпанның 10-ы. ҚазАқпарат /Әлия Алтынғазина/ - БҰҰ-ның Білім, ғылым және мәдениет мәселелері жөніндегі ұйымы (ЮНЕСКО) Ана тілінің халықаралық күні қарсаңында жоғалудың алдында тұрған тілдер атласының жаңартылған нұсқасын дайындады,
деп хабарлайды ҚазАқпарат. ЮНЕСКО-ның баспасөз баянында атап көрсетілгендей, бұл санатқа әлемдегі қолданыстағы 6000 тілдің 2500-ден астамы жатады екен. Ай сайын әлемде 2 тіл жоғалады. Австралиялық профессор Кристофер Мосселей бастаған бір топ лингвистер бұл атласты Норвегияның демеушілігінің арқасында әзірлеп отыр. Ана тілінің халықаралық күні 1999 жылғы қарашада ЮНЕСКО Бас Конференциясының 30-шы сессиясының шешімімен бекітілген және 2000 жылғы ақпанның 21-інен бастап тілдік және мәдени әр алуандықты қорғау мақсатында атап өтіліп келеді.
