Аягөзде жаңа саябақ салынады
АЯГӨЗ. ҚазАқпарат – Шығыс Қазақстан облысы Аягөз ауданында Қазақ хандығының 555 жылдығы аясында саябақ салынады, деп хабарлайды ҚазАқпарат.
Биыл айтулы датаға орай ауданда Шақантай батырға, Жобалай және Байқотан билерге ескерткіш орнатылмақ. Сондай-ақ мемлекеттік-жекешелік әріптестік аясында саябақ ашу жоспарланып отыр.
«Аудандық орталықтандырылған және барлық ауылдық округтердегі кітапханаларда Қазақ хандығына арналған іс-шаралар легі бекітілді. Мамыр айында Тарлаулы ауылында «Қазақ хандығының тарихы» атты дөңгелек үстел өтеді», - дейді Аягөз ауданы әкімінің орынбасары Болат Сүлейменов.
Оның айтуынша, әл-Фарабидің 1150 жылдығы да қалыс қалмайды. Аталмыш мерейтой аясында 30-дан астам шара өткізу көзделген.
