Аяздың беті ендігі аптада сынады
АСТАНА. ҚазАқпарат - Алдағы күндері Астанада қатты аяз болады. Синоптиктердің болжамынша, ауа температурасы келер аптада ғана көтеріледі. Бұл туралы astana.kz сайтына «Қазгидромет» РМК хабарлады.
Метеорологтардың хабарлауынша, елордада апта соңына дейін күн суық болады, түнде -30;-35°C, күндіз -23;-30°C аяз тұрады. Ертең елордада күн бұлтты болады, аздап қар жауады. Солтүстік-шығыстан, шығыстан 9-14 м/с жылдамдықпен жел соғады. Түнде ауа температурасы -30;-32°C, күндіз -24;-26°C. 31 қаңтарда күн ала бұлтты, жауын-шашынсыз болады. Солтүстік-шығыстан 9-14 м/с жылдамдықпен жел соғады. Түнде ауа температурасы -33;-35°С, күндіз -28;-30°C. «Аязды күн райы 2 ақпанға дейін сақталады. Содан кейін ауа температурасы -20;-25°C, түнде -30;-35°C дейін көтерілуі ықтимал», - деді аstana.kz сайтына «Қазгидромет» РМК. Айта кетейік, бірнеше күннен бері қатты аяз салдарынан елордалық мектептерде сабақ өткізілмей келеді. Бүгін бірінші ауысымдағы 1-11 сынып оқушылары мен колледждердің 1,2 курс студенттері үшін сабақ өткізілген жоқ. Екінші ауысымда оқитын 1-4 сынып оқушылары да мектепке бармайды. Еске салайық, оқу жылының қысқы кезеңінде оқушылардың қауіпсіздігі мен денсаулығын сақтау мақсатында 1-4 сыныптарда ауаның температурасы -25 градус және одан төмен болғанда; 1-9 сыныптарда ауаның температурасы -30 градустан төмен болғанда; 1-11(12) сыныптарда, кәсіптік лицейлерде, колледждерде (1-2 курс оқушылары үшін) - 35 градустан төмен болғанда Астана қаласы әкімдігімен келісілген білім ұйымдарында сабақты тоқтатудың параметрлері белгіленген болатын.
