Айдың екінші жақ бетіне алғаш рет ғарыш кемесі қонды
АСТАНА. ҚазАқпарат - Қытайдың «Чанъэ-4» автоматтандырылған ғарыш кемесі адамзат тарихында алғаш рет Айдың екінші жақ бетіне қонды, деп хабарлайды «ҚазАқпарат» ХАА bbc.com сайтына сілтеме жасап.
Қытайлық БАҚ-тың мәліметінше, «Чанъэ-4» ғарыш аппараты Айдың арғы бетіне 3 қаңтар күні Қытай уақытымен сағат 10:26-да қонған. Бұл, ғарыш кемесінің Жердің табиғи серігінің арғы бетіне тарихтағы алғашқы сәтті қонуы болды.
Ғарыш аппараты Айдың теріс бетіндегі қоршаған ортаны, үстіңгі қабатын, топырағын зерттеуге арналған құралдармен жабдықталған. Бұдан басқа, «Чанъэ-4» оның бетінде биологиялық эксперименттер жүргізетін болады.
Қытай Ұлттық ғарыш басқармасы (CNSA) Айдың арғы бетінің алғашқы суреттерін жариялап үлгерді.
