Әйел адамды зорлап, өлтіргені үшін іздеуде жүрген ҚР азаматы Таиландтан ұсталды

АСТАНА. ҚазАқпарат - Таиландта әйелді зорлап өлтіргені үшін іздеуде жүрген қазақстандық Сырым Парманов ұсталды, деп хабарлады таиландтық Pattaya Daily News басылымы.

Газеттің хабарлауынша, жуырда көші-қон полициясының майоры Тамронг Сэнгваттанакунге ауыр қылмыс жасағаны үшін іздеуде жүрген Қазақстан азаматы SP Village үйінде жасырынып жүргені туралы хабар келіп түсті. Жедел топ Пармановты ұстауға шықты.

Оқиға орнына келген полицейлер жалға алынған үйдің маңынан 37 жастағы ер адамды байқайды. "Полицейлер Қазақстан билігі берген қамауға алуға рұқсат құжатын көрсетіп, дәйектеме ретінде төлқұжатын алып, күдіктіні ұстады", - делінген жарияланымда.

Таиланд полициясы түсіндіргендей, көші-қон полициясына Қазақстан Елшілігінен Қазақстанда әйел адамды зорлап өлтірген қылмыстық топтың мүшесі Пармановты қолға түсіруге жәрдемдесу өтініші келіп түскен. Қылмыс 2010 жылы жасалған.