Әйелді ұрып-соғып, тонап кеткен Кентау тұрғыны ұсталды

АСТАНА. ҚазАқпарат - Кентау ҚІІБ-ның кезекші бөліміне арызданған 32 жастағы әйел шілде айында қаладағы көшелердің бірінде 25-30 шамасындағы белгісіз азамат тап беріп, оны ұрып, бағалы заттары бар сөмкесін тартып алып кеткенін көрсеткен. Аталған жайт бойынша ҚР ҚК-нің 191-ші «Тонау» бабы бойынша  Кентау ҚІІБ СДТБТ-не тіркелді.

Бұл туралы ОҚО ІІД Мемлекеттік тіл және ақпарат басқармасы хабарлады.

Кентау ҚІІБ жедел-іздестіру іс-шараларының барысында бұрын сотты болған, 1987 жылғы жергілікті тұрғынды ұстады.  Айғақты заттар ретінде сөмке және ұялы телефон тәркіленіп алынды. Тергеу барысы анықтағандай, 30 жастағы ұсталған азамат қарсылық көрсете алмайтын әлсіз әйелді тонауды мақсат еткен. Құрбанына бас салып, күш қолданып, бағалы заттары мен сөмкесін алып, оқиға орнынан бой тасалаған.  Қазіргі таңда күдіктінің басқа да қылмыстарға қатыстылығы анықталу үстінде.

Кентау қаласының полицейлері қала тұрғындарына көшелер мен қоғамдық орындарда бейтаныс азаматтармен тілдескенде ерекше сақ болуын ескертеді.