Айгүл Иманбаеваның театры Македониядағы фестивальде бас жүлдені еншіледі
АСТАНА. ҚазАқпарат – Айгүл Иманбаеваның «А.И.» музыкалық-театрлық орталығы Македониядағы «Стоби» антикалық театрлардың XIII халықаралық фестивалінде Гран-при сыйлығына ие болды.
Бұл туралы Instagram арқылы актриса Айгүл Иманбаеваның өзі хабарлады.
«Достар, қолдауларыңызға рахмет! «А.И.» музыкалық-театрлық орталығы Македониядағы «Стоби» антикалық театрлардың XIII халықаралық фестивалінде Гран-при сыйлығына ие болды», - деп жазды ол.
«А.И» театрының ұжымы фестиваль көрермендеріне «Медея» спектаклін ұсынған. Айта кетейік, Айгүл Иманбаева қазақстандықтарға актриса ретінде ғана емес, әнші, танымал шоу-бағдарламалардың тележүргізушісі ретінде де белгілі.
