Азамат Айтқожин Қазақстан футбол федерациясының бас хатшысы қызметіне тағайындалды

АСТАНА. ҚазАқпарат - Қазақстан футбол федерациясының Атқарушы комитеті бас хатшы қызметіне Айтқожин Азамат Серікұлын тағайындады. Ол осы уақытқа дейін Қазақстан футбол федерациясының атқарушы директоры қызметін атқарып келді. Бұл туралы федерацияның баспасөз қызметінен хабарланды.

Азамат Серікұлы 1975 жылы 15 мамырда Целиноград қаласында дүниеге келді. Ол спорттық қызметін 2003 жылы Қажымұқан Мұңайтпасов атындағы стадионның директоры болып бастады. Кейін «Жеңіс» футбол клубына жетекшілік етіп, командамен бірге ҚР чемпионатының қола жүлдесі және Қазақстан Кубогын жеңіп алды. Сонымен қатар, Астана қаласының туризм және спорт департаментінің басшысы болды.

2007-2009 жылдар аралығында «Астана Арена» спорт кешенінің директоры қызметін атқарған. Сондай-ақ, «Жастар» спорт сарайын басқарды. Кейін «Астана» футбол клубының президенті болып, командасымен бірге Қазақстан Кубогын жеңіп алған болатын.