Азаматтық қорғау саласы бойынша 8 мыңнан астам адам білім алды - ТЖМ
АСТАНА. KAZINFORM - Жыл басынан бері Қазақстан Төтенше жағдайлар жүйесінде азаматтық қорғау мәселелері бойынша 8 362 тыңдаушы оқытудан өтті, деп хабарлайды ҚР Төтенше жағдайлар министрлігінің баспасөз қызметі.
Халықты, мемлекеттік органдар мен ұйымдардың өкілдерін даярлау жұмыстарын Азаматтық қорғаныс ұлттық орталығы және ТЖМ-нің аумақтық бөлімшелері жүзеге асырады.
Азаматтық қорғаныс ұлттық орталығында 938 тыңдаушы оқытудан өтті. Олардың қатарында орталық мемлекеттік органдар мен жергілікті атқарушы органдардың өкілдері бар.
Оқу барысында қатысушылар азаматтық қорғаудың негіздерін, төтенше жағдайлар кезіндегі іс-қимыл тәртібін, сондай-ақ төтенше жағдайлардың алдын алу және олардың салдарын жою жөніндегі іс-шараларды ұйымдастыру мен өткізу мәселелерін меңгерді.
ТЖД бөлімшелері 7 424 адамды оқытты. Қауіпсіздік саласындағы еріктілер қозғалысын дамытуға ерекше назар аударылып отыр. Жыл басынан бері 549 ерікті дайындықтан өтіп, профилактикалық іс-шараларды өткізуге қолдау көрсетіп, халық арасында қауіпсіздік мәдениетін арттыру жұмыстарына қатысып жатыр.
Халық пен мамандарды оқыту – төтенше жағдайлар жағдайында іс-қимыл жасауға дайындық деңгейін арттыруға және азаматтардың өмірі мен денсаулығына төнетін қауіп-қатерлерді азайтуға бағытталған ТЖМ қызметінің негізгі бағыттарының бірі болып табылады.
Осыған дейін хабарлағанаымыздай, ТЖМ құтқарушылары сейсмикалық қауіптер бойынша халықаралық жаттығуға аттанды.
