Әзербайжан визасыз кіретін елдер тізімін кеңейтеді
АСТАНА.KAZINFORM - Әзербайжан туристерді ынталандыру мақсатында азаматтарына визасыз кіру рұқсаты берілетін мақсатты туристік елдер санын 34-ке дейін арттыруды жоспарлап отыр, деп хабарлайды агенттіктің Бакудегі тілшісі.
Бұл шара Әзербайжан Президенті Ильхам Әлиевтің 20 тамыздағы жарлығымен бекітілген Әзербайжан Республикасында туризмді дамытудың 2026-2030 жылдарға арналған мемлекеттік бағдарламасының іс-шаралар жоспарында көзделген.
Құжатқа сәйкес, бағдарламада тұрақты төлқұжаты бар мақсатты туристік елдердің азаматтары үшін визасыз режимді біржақты немесе өзара қолдану үшін қажетті ішкі рәсімдерді енгізу жоспарланған.
Бағдарламаның мақсаты - 28 мақсатты туристік елдің азаматтары үшін визасыз кіруді қамтамасыз ету, сондай-ақ бұл көрсеткішті 34-ке дейін арттыру. Бұл шараны 2026 және 2030 жылдар аралығында жүзеге асыру жоспарланған.
Сонымен қатар, бағдарламада Әзербайжанның туристік әлеуетін халықаралық деңгейде насихаттау көзделген. Осы мақсатта халықаралық медиа мен цифрлық платформаларды пайдалану жоспарланған.
Сонымен қатар, бағдарлама туристік мақсаттағы электронды визаларды беру рәсімдерін жеңілдетуді, азаматтары электрондық виза ала алатын елдердің тізімін кеңейтуді және ASAN Visa жүйесінің техникалық мүмкіндіктерін жақсартуды көздейді.
Бұған дейін Қазақстан АҚШ туристері үшін қауіп деңгейі төмен елдер қатарына енді.
