Әзербайжанға үш жаңа бағыт ашылады
АСТАНА. KAZINFORM — Қазақстан мен Әзербайжан арасындағы рейстер саны аптасына 30-дан 33 рейске дейін ұлғайды, деп хабарлайды Көлік министрлігінің баспасөз қызметі.
Көлік министрлігі ұшу географиясын кеңейту және қолданыстағы бағыттар бойынша рейстер санын арттыру жөніндегі жұмысты тұрақты негізде жүргізіп келеді.
Биылғы жылдың 16 маусымынан бастап AZAL әуе компаниясы Шымкент — Баку бағыты бойынша аптасына 3 рет жиілікпен жаңа тұрақты рейстерді орындауды бастады. Нәтижесінде Қазақстан мен Әзербайжан арасындағы рейстер саны аптасына 30-дан 33 рейске дейін ұлғайды.
Сонымен қатар, әуе компаниясы Ақтөбе — Баку бағыты бойынша аптасына 3 рет және Атырау — Баку бағыты бойынша аптасына 4 рет тұрақты рейстерді орындауды жоспарлап отыр.
— Жаңа бағыттардың ашылуы Қазақстан Республикасы мен Әзербайжан Республикасы арасындағы сауда-экономикалық, іскерлік және туристік ынтымақтастықтың одан әрі дамуына ықпал етеді, — дейді ведомство өкілдері.
Бұған дейін Әзербайжан жүк тасымалдау көлемін екі есеге арттыратынын жазғанбыз.
