Азиада-2018: Қазақстандық балуан қола медальды жеңіп алды
АСТАНА. ҚазАқпарат - Индонезияда өтіп жатқан ХVIII Жазғы Азия ойындарында бүгін грек-рим күресінен 87 келіге дейінгі салмақта ел намысын қорғаған Азамат Құстыбаев Азия ойындарының қола жүлдегері атанды. Бұл туралы ҚазАқпарат тілшісі ҚР Ұлттық Олимпиадалық комитеттің бапасөз қызметіне сілтеме жасап хабарлайды.
Баспасөз қызметінің мәліметтеріне қарағанда, қола жүлде үшін тартыста Азамат үндістандық балуанды 6:3 есебімен жеңді.
Азамат Азия ойындарындағы алғашқы кездесуінде тәжірибелі өзбек балуаны Рустам Ассакаловқа есе жіберген еді.
Жұбаныш белдесуінде қазақстандық спортшы қырғызстандық Самат Ширдаковты жеңді.
Еске сала кетейік, грек-рим күресінің өкілдері кеше бір күміс, бір қола медаль иеленген болатын.
