Азиада-2026: жеңіл атлет Кристина Морозова ел қоржынын күміс медальмен толықтырды
АСТАНА. KAZINFORM — Жапонияның Аичи және Нагоя қаласында өтіп жатқан 2026 жылғы Азия ойындарында Қазақстан кезекті күміс жүлдеге ие болды, деп хабарлайды ҚР Ұлттық Олимпиада комитеті.
Аичи және Нагояда (Жапония) өтіп жатқан 2026 жылғы Азия ойындарында жеңіл атлетикадан жарыстар басталды.
Бұл спорт түріндегі алғашқы жүлделер жартылай марафон қашықтығындағы спорттық жүрістен сарапқа салынды.
Әйелдер арасындағы бәсекеде Қазақстан өкілі Кристина Морозова 1:35:25 нәтижесімен күміс медаль жеңіп алды.
Жарыста Қытай спортшысы Ян Люцзин 1:33:40 уақыт көрсеткішімен жеңіске жетті. Үздік үштікті тағы бір қытайлық спортшы Юньянь Цзян 1:35:26 нәтижесімен түйіндеді.
Қазақстан құрамасының тағы бір мүшесі Эльмира Калимуллина 1:43:21 нәтижесімен алтыншы орынға ие болды.
Еске сала кетсек, бұған дейін Қазақстан құрамасының 23 қыркүйектегі жарыс кестесін жарияладық.
Сондай-ақ кеше ел қоржыны төрт жүлдемен толыққанын сүйіншіледік.
