12:07, 13 Шілде 2018 | GMT +6
Азиада алдында ескек есушілер ел біріншілігіне қатысады
АСТАНА. ҚазАқпарат - Академиялық ескек есуден Жазғы Азия ойындары алдындағы Қазақстан чемпионаты басталады, деп хабарлайды ҚазАқпарат тілшісі.
ҚР ҰОК баспасөз қызметі таратқан мәліметте көрсетілгендей, ел біріншілігі шілденің 14-18 аралығында Теміртаудағы Самарқан су қоймасында өтеді.
Қазақстан чемпионатына еліміздің үш облысы мен бір қаласынан спортшылар қатысады. Атап айтар болсақ, Қарағанды, Батыс Қазақстан, Түркістан облыстары, сондай-ақ, Астана қаласының ескек есушілері өзара бақ сынайды.
Қазақстан біріншілігінде бабы мен бағы қатар шапқан спортшылар арасынан Жазғы Азиада ойындарына қатысатын ұлттық құрама мүшелері жасақталады. Спортшылар ел біріншілігінде 2 километрге 14 олимпиадалық бағдарлама бойынша жарысады.
Еске сала кетейік, Жазғы Азия ойындары Джакартада (Индонезия) 18 тамыз бен 2 қыркүйек аралығында өтеді.