АЗИАДА: Оңтүстіккореялық жігіттер құрлық рекордын жаңартып, шорт-тректен 5000 метрлік эстафеталық жарыста чемпион атанды
АСТАНА. 2 ақпан. ҚазАқпарат /Гүлмира Әлиакпарова/ - Ақ Азиада аясында Астанада өткен шорт тректен 5000 метрлік ерлер эстафетасы жарысында оңтүстіккореялық спортшылар құрлық рекордын жаңартып, алтын жүлдені жеңіп алды.
Ли Хо Сук (Lee Ho Suk), Но Джинкю (Noh Jinkyu), Сун Ши Бак (Sung Si Bak), Ким Бёнджун (Kim Byeongjun) сынды спортшылардан құралған команда 5 шақырым қашықтықты 6 минут 44,705 секунда жүгіріп өтіп, 2007 жылы орнатылған Азия рекордын 0,134 секундқа жаңартты.
Екінші орынды жапондық спортшылар - Юдзо (Takamido Yuzo), Уэмура Даидзуке(Uemura Daisuke), Сакадзуме Рёсуке (Sakazume Ryosuke) және Фудзимото Такахиролар (Fujimoto Takahiro) алды. Олар көмбеге чемпиондардан 10 секундтай кейін келді. Бұл сында Қазақстан намысын қорғаған шорт-трекшілер Айдар Бекжанов, Артур Сұлтанғалиев, Нұрберген Жұмағазиев және Абзал Әжғалиевтар қола жүлдегерлер атанды.
Бұдан бұрын хабарлағанымыздай, 3000 метрлік әйелдер эстафетасы жарысында қазақстандық шорт-трекші қыздар да құрама қоржынына қола жүлде салды.
