Азық-түлік келісім шарт корпорациясы форвардтық астық сатып алуға өтініштер қабылдай бастады

АСТАНА. ҚазАқпарат - «Азық-түлік келісім шарт корпорациясы» ҰК» АҚ 2016 жылғы 14 наурызда әлеуметтік-кәсіпкерлік корпорациялар кепілідіктері бойынша көктемгі-жазғы қаржыландыру арқылы ауылшаруашылық тауар өндірушілерінен (АШТӨ) форвардтық астық сатып алу бағдарламасының басталғаны туралы хабарлайды.

Компанияның баспасөз қызметінің хабарлауынша, биыл осы мақсаттарға республикалық бюджеттен 14 млрд теңге бөлінген. Алдыңғы жылдардағыдай, бағдарламаға қатысатын АШТӨ тізімін облыс әкімдіктері жанындағы Үйлестіру кеңесі бекітеді. Сондықтан бағдарламаның басты шарттарының бірі: АӨК субъектілерінің Азық-түлік келісім шарт корпорациясымен жасасқан 2012 жылғы қаржыландыру және 2013-2015 жылдарға форвардтық астық сатып алу шарттары бойынша өз міндеттемелерін толық орындауы, сондай-ақ, «ҚазАгро» Холдинг» АҚ еншілес компаниялары және басқа да қаржы ұйымдары алдында мерзімі өткен міндеттемелері болмауы тиіс.

Жоғарыда аталған қаржы 1 га егіс алқабына 6 000 теңге есебімен аграрийлердің көктемгі-жазғы жұмыстары мен астық жинау кнауқанын жүргізуге бағытталады. Астық өндірушілер астық жеткізіп беру арқылы жасасқан шарттар бойынша өз міндеттемелерін 2016 жылғы 1 қарашасына дейінгі мерзім ішінде орындауы тиіс.