БАӘ балалы отбасыларға бірнеше реттік туристік виза режимін енгізді
АСТАНА. ҚазАқпарат – Біріккен Араб Әмірліктері 18 жасқа толмаған балалары бар отбасыларға елге бірнеше рет кіруге мүмкіндік беретін 5 жылдық туристік виза рәсімдеуге рұқсат берді, деп хабарлайды ҚазАқпарат тілшісі.
БАӘ сәйкестендіру, азаматтық, кедендік және порттық қауіпсіздік жөніндегі федералды басқармасының (ICP) мәліметтері бойынша виза алу үшін демеушілік кепілдік сұралмайды.
Басқарма дерегінше, виза иесінің 1 жыл ішінде елде болу уақыты 90 күннен аспауы тиіс. Оның мерзімі аяқталған жағдайда бір рет тағы да 3 айға создыртуға болады. Яғни, ең ұзақ мерзім - 6 ай.
Бұл ретте, елде болу мерзімін өзгерту үшін келер жылды күтпейсіз. Себебі оның уақыты виза берілген күннен бастап есептеледі. Егер азамат 1 жыл ішінде БАӘ-де 90 күннен аз болса, артық күндері келесі жылға қалдырылмайды.
Виза алу үшін қойылатын талаптар:
- 6 ай ішінде жасалған банк операцияларының көшірмесі;
- азаматтың банк шотында кемінде 4 мың доллар болуы тиіс;
- БАӘ-де медициналық сақтандыруды 180 күнге рәсімдеу қажет;
- виза берілген күннен бастап 60 күн ішінде БАӘ-ге бару қажет. Егер бұл уақыттан кешіккен жағдайда құжаттың күші жойылады.
Отбасылық визаға өтінішті тек 18 жасқа дейінгі балалары бар отбасылар бере алады. Бүлдіршіндердің ата-аналары барлық талапты сақтай отырып, құзырлы органға өз бетінше өтініш жолдауы тиіс.
