Бағаны әкімшілік жолмен реттеу салалардың инвестициялық тартымдылығын төмендетеді – Президент
НҰР-СҰЛТАН. ҚазАқпарат – ҚР Президенті Қасым-Жомарт Тоқаев Қазақстан халқына Жолдауында бағаларды әкімшілік жолмен реттеу тәсілінен біртіндеп бас тарту керектігін мәлім етті, деп хабарлайды ҚазАқпарат тілшісі.
«Бірінші, бағаларды әкімшілік жолмен реттеу тұтас салалардың инвестициялық тартымдылығын төмендетіп, тауарлардың тапшылығы мен импортқа тәуелділікке әкеледі. Сондықтан, мемлекет бағаның қалыптасуына қатысуынан кезең-кезеңмен бас тарту керек», - деді Қасым-Жомарт Тоқаев
Мелекет басшысы мұның бәсекеге бейім емес нарықтарға қатысы жоқ екенін ескертті.
«Монополистердің тарифтері тығыз бақылауда қалып отыр. Бірақ бақылау дегеніміз мүлде қысым көрсету дегенді білдірмейді», - деді Президент.
Айта кету керек, бүгін Мемлекет басшысы Қасым-Жомарт Тоқаев ҚР Парламенті палаталарының бірлескен отырысында Қазақстан халқына Жолдауын жариялайды.
Бұдан бұрын хабарланғандай, Жолдаудың негізгі бөлігі еліміздің әлеуметтік-экономикалық дамуына арналады.
