«Баку-Алматы» ұшағында тәртіп бұзған Үндістанның үш азаматы жазаланды
НҰР-СҰЛТАН. ҚазАқпарат – Тәртіп сақшылары «Баку-Алматы» әуе рейсінен Үндістанның үш азаматын түсіріп алды, деп хабарлайды ҚазАқпарат тілшісі ҚР ІІМ Көліктегі полиция департаментінің баспасөз қызметіне сілтеме жасап.
«6 қараша күні Алматыдағы халықаралық әуежайдың желілік полиция бөліміне «Эйр Астана» әуе компаниясының өкілінен шағым түсіп, «Баку-Алматы» әуе рейсінің бортында тәртіп бұзған жолаушылар бары хабарланған. Шағым түсірушілердің сөзінше, ұшақ бортындағы шетел азаматтары әуе кемесінің борттық ережесін бұзып, экипаждың ескертуін елемей, басқа жолаушылардың да мазасын алған», - деп хабарлайды департаменттен.
Тексеру барысында құқықбұзушылардың 34, 40 және 41 жастағы Үндістан азаматтары екені анықталған.
«Істің мән-жайы анықталғанша үшеуі де жоғарыда аталған рейстен түсірілді» делінген хабарламада.
Көлік полицейлері шетел азаматтарының үстінен ҚР ӘҚБтК-нің 566-бабы 1-бөлігі бойынша (Әуе кемесінің бортында тәртіп бұзу) әкімшілік хаттама толтырып, әрқайсысына 3 АЕК-тен айыппұл салды.
