Баку, Тбилиси, Анкара мен София «жасыл» энергия дәлізін салу туралы келісті

АСТАНА. KAZINFORM – Меморандумға Бакуде Әзербайжан, Грузия, Түркия мен Болгария энергетика министрлері қол қойып, қалпына келетін энергия дәлізінің қалыптасуына негіз қалады, деп хабарлайды Kazinform агенттігінің меншікті тілшісі.

Құжатқа Жасыл энергетика бойынша Консультативтік кеңес аясында Оңтүстік газ дәлізі мен 3-ші министрлік мәжілісі Консультативтік кеңесі аясындағы 11-ші министрлік мәжілісінде қол қойылды.

Мәжіліске Әзербайжанның энергетика министрі Пярвиз Шахбазов, Грузияның экономика жне тұрақты даму министрінің орынбасары Вахтанг Цинцадзе, Түркияның энергетика және табиғи ресурстар министрі Алпарслан Байрактар мен Болгарияның энергетика министрі Жечо Станков қол қойды.

Болгария энергетика министрі Жечо Станковтың айтуынша, жаңа дәліз «жасыл» электр энергиясын Каспий өңірінен оңтүстік-шығыс Еуропаға, нақтырақ айтқанда, Болгария, Румыния және Мажарстанға жеткізілуін қамтамасыз етеді.

Меморандум жобасын 4 мемлекет 7 ақпанда келіскен.

Құжат 3 жылға есептелген. Егер тараптардың ешқайсысы келісімнің тоқтатылуын талап етпесе, оның мерзімін автоматты түрде кейінгі үш жылға созуға болады.

Құжат талаптарына сәйкес, төрт мемлекеттің энергетика министрлері электр энергиясын беру мен саудалау мүмкіндіктерін кеңейтуге бағытталған энергия жүйесін жаңғырту мен бірлескен инвестициялық жобалардың мүмкіндіктерін зерделеу үшін мемлекеттік және жеке сектордың ынтымақтастығын нығайтуға ықпал ететін болады.

Меморандум жасыл энергия саласы бойынша бірлескен жобаларды жетілдіріп, оған қажетті инфрақұрылым қалыптастырып, білім және технология алмасу, сонымен қатар екіжақты өзара тиімді бастамаларды қолдауға келісуді білдіреді.

Осыған дейін біз Мирзиёев Қазақстанмен бірлесіп, жасыл энергияны экспорттау келісімін мақұлдағаны туралы жаздық.