Бакудегі халықаралық турнирінде үш боксшымыз жартылай финалға шықты

АСТАНА. ҚазАқпарат - Бакудегі «Ұлы Жібек жолы» халықаралық турнирінде үш боксшымыз жартылай финалға шықты, деп хабарлайды ҚазАқпарат тілшісі.

Бұл турнирде қазақ елінің намысын 6 боксшы қорғап жатыр. Атап айтар болсақ, Асхат Жүсіпов (49 келі), Олжас Байниязов (52 келі), Серік Теміржанов (60 келі), Аян Қалыбеков (64 келі), Илья Очкин (69 келі) мен Бек Нұрмағамбет (81 келі).

Бүгін осы боксшылар арасынан Асхат Жүсіпов, Олжас Байниязов және Бек Нұрмағамбет үшеуі жартылай финалға өтті.

Айта кетейік, Бакудегі «Ұлы Жібек жолы» халықаралық турниріне қазақ боксшыларын жаттықтырушылар Азамат Мақажанов пен Александр Стрельников бастап барған болатын. Ал бас бапкер Мырзағали Айтжанов бастаған 10 боксшы Германияның Галле қаласында өтіп жатқан «Chemistry Cup» халықаралық турнирінде сынға түсуде. Оның 9-ы жартылай финалға шықты.

Енді ертең ұлттық құраманың 5 боксшысы Финляндия елінің астанасы Хельсинкиде жалауы желбірейтін «GeeBee» халықаралық турнирінде бақ сынайды. Атап айтар болсақ, Нұрбол Қалжанов (56 келі), Садриддин Ахмедов (69 келі), Тұрсынбай Құлахмет (75 келі), Бекзат Нұрдәулетов (81 келі) пен Нұрлан Сапарбай (91 келі) жарыс жолына шығады.