Балалар үйінің 100-ден астам тәрбиеленушісі республикалық фестивальде бақ сынайды

АСТАНА. ҚазАқпарат - Осы сенбіде ата-ана қамқорлығынсыз қалған балалар шығармашылығының І республикалық фестивалі өтеді. Фестиваль ұйымдастырушылары - Қазақстан Республикасының Мәдениет және спорт министрлігі, «Актив лайф» мүгедектердің қоғамдық бірлестігі және Бахытжан Тажиновтың Шығармашылық шеберханасы, деп хабарлайды ҚазАқпарат тілшісі. 

Фестивальге Астана қаласындағы және Қазақстан Республикасының басқа да өңірлеріндегі балалар үйінің 7 жастан 18 жасқа дейінгі тәрбиеленушілері қатысады.

Еліміздің әйгілі өнер шеберлері, аса көрнекті мәдениет қайраткерлері және Қазақстанның түкпір-түкпірінен жиналған талантты балалар бір сахна төрінде тоғысады.

Фестиваль күндері іс-шара қатысушылары мен қонақтарына арналған шығармашылықтың әртүрлі бағытындағы атақты мамандардың шеберлік сыныптары мен семинарлары өткізіледі.

Фестивальдің байқаулық бағдарламасы бірнеше номинация бойынша жүргізіледі:

1. «Эстрадалық вокал» - патриоттық әндерді орындау.

2. «Заманауи ұлттық киім үлгісі».

3. «Көркем сөз» - туған жер туралы шығарманы орындау.

4. «Халықтық қолөнер» - Ұлы дала шебері.

5. «Фотосурет» өнері - менің заманымдағы батырлар.

6. «Хореография» - қазақтың ұлттық биі.

 «Бұл фестивальде балалардың өнері тамашаланып қана қоймайды, балаларға үміт, жаңа өмірге бастама беріледі. Біздің мақсат - балаларға жылулықты, қамқорлықты өнер арқылы сезіндіру. Ал фестиваль қатысушыларына келсек, «Эстрадалық вокал» номинациясы бойынша 36 қатысушы сынға түседі және де бұл ең үлкен көрсеткіш, келесі «Көркем сөз» номинациясында - 23 қатысушы, «Халықтық өнерде» - 21 қатысушы, «Хореография» - 16 қатысушы, «Фотосурет» - 13 қатысушы,«Заманауи ұлттық киім үлгісі» - 12 қатысушы бақ сынайтын болады. Ең көп үміткер Оңтүстік Қазақстан облысынан келді, олардың саны - 17 бала», - дейді жобаның авторы әрі бас режиссері Бақытжан Тажинов.

Байқау күндерінің қорытындысы бойынша кәсіби әділ қазылар алқасы әр номинация бойынша үш жүлделі орынның лауреаттарын және Гран-при иегерін таңдап алады.

30 маусым күні еліміздің ең үлкен телеорталығы «Қазмедиа Орталығында» үздік хореографиялық және орындаушылық ұжым мен «Бүгіннің баласы -болашақтың данасы» атты алғашқы ата-ана қамқорлығынсыз қалған балалар шығармашылық республикалық фестивалі жеңімпаздарының қатысуымен гала-концерт өткізіледі.

Еске сала кетейік, «ҚазАқпарат» халықаралық ақпарат агенттігі - аталмыш байқаудың ақпараттық серіктесі.