Балқаш алабұғасына арналған коллекциялық монеталар айналымға енгізілді

АСТАНА. ҚазАқпарат – Бүгін Ұлттық банк«Қазақстанның флорасы мен фаунасы» сериясынан BALQASH ALABUǴASY коллекциялық монеталарын айналымға шығарады, деп хабарлайды ҚазАқпарат.

Монеталардың сатылымға шығатын күніне қатысты қосымша ақпарат Ұлттық банк сайтында жарияланатын болады.

Балқаш көлі – Қазақстандағы ең алып көлдердің бірі және көлемі жағынан әлемде 15-орында тұр. Тұзды және тұщы бөліктен тұратын әлемдегі жалғыз табиғи су тоғаны.

Балқаш алабұғасы – көлде кездесетін эндемикалық балықтардың бірі. Ол 5-7 миллион жыл бұрын жақын тұқымдасы – кәдімгі өзен алабұғасынан шыққан. Қазақстанның Қызыл кітабына енгізілген.

BALQASH ALABUǴASY коллекциялық монеталары 2 түрде дайындалды:

1. 925/1000 сынамалы күмістен жасалған. 3D және аса жоғары бедерлі технология қолданылған. Массасы – 100 грамм, диаметрі – 50 мм, номиналы – 1000 теңге, таралымы – 500 дана;

2. МН 25 мельхиор қоспасынан дайындалған. Массасы – 15 грамм, диаметрі – 33 мм. Дайындау сапасы – «рrооf-like», номиналы – 200 теңге, таралымы – 20 мың дана.

Ұлттық банктен мәлім еткендей, коллекциялық монеталар Қазақстанның бүкіл аумағында өзінің белгіленген құнына сай төлемнің барлық түрі бойынша қабылдана береді. Сондай-ақ елдің барлық банкінде банк шоттарына есепке алынады, аударылады, ұсақталады және айырбасталады.

Коллекциялық монеталар Қазақстан теңге сарайында дайындалды.

Фото: www.nationalbank.kz