Балқаш көлінде із-түзсіз жоғалған балықшылардың денелері табылды
ҚАРАҒАНДЫ. ҚазАқпарат - Қарағанды облысы ТЖ департаменті жедел-құтқару жасағының құтқарушылары Балқаш көлінен наурыз айында із-түзсіз жоғалған балықшылардың өлі денелерін тапты, деп хабарлайды «ҚазАқпарат» ХАА тілшісі.
Балықшылардың денелері Ақтоғай ауданындағы «Корс» түбегінің оңтүстік жағалауынан бір шақырым жерден табылды. Екеуі де Балқаш тұрғындары болған. Олар 30 наурыздан бері із-түзсіз жоғалғандар қатарында болды. Сол күні ТЖ департаментіне туыстары балықшылардың үйге оралмағанын, байланыс үзілгенін хабарлаған.
«9 сәуір күні 17:50-де ТЖ департаменті жедел-құтқару жасағының төрт құтқарушысы екі ер адамды өлі күйінде тапты. Жағдайдың мән-жайы анықталуда. 30 наурыздан күні кешеге дейін ер адамдар із-түзсіз жоғалғандар санатында еді», - деп хабарлады Қарағанды облысы ТЖ департаментінің баспасөз хатшысы Айдана Жүсіп.
