Балқашта заманауи емхана ғимараты салынды

ҚАРАҒАНДЫ, ҚазАқпарат - № 2 емханаға бекітілген Балқаш тұрғындары енді жаңа заманауи ғимаратта медициналық көмек алатын болады, деп хабарлайды ҚазАқпарат Денсаулық сақтау министрлігіне сілтеме жасап.

Медициналық мекеме МЖӘ бойынша салынған және 19 мыңнан астам ересектер мен балаларға қызмет көрсететін болады. Ол сондай-ақ әрең жүретін пациенттер үшін барлық жағдайлар жасалған.

«Біздің емхана 1978 жылы салынған ғимаратта болған және оған ешқашан күрделі жөндеу жасалмаған еді. Біз өз жұмысымызды отбасылық-дәрігерлік амбулатория ретінде бастадық, 2000 жылы емханаға айналдырдық»,-дейді № 2 емхананың директоры Айнагүл Күлембаева.

Енді пациенттер медициналық-санитариялық алғашқы көмек қызметтерінің барлық тізбесін, арнайы мамандардың консультациясын ала алады, анализдер тапсыра алады, күндізгі стационарда емделе алады, оңалту көмегі мен физиотерапия ала алады.

Сондай-ақ, емхананың жанындағы жедел жәрдем, әлеуметтік дәріхананың, пациенттерді қолдау қызметінің жұмысы жолға қойылған.

Емхананың жаңа ғимаратында диагностикалық қызметтер де көзделген. Ультрадыбыстық зерттеулердің толық спектрі, эндоскопиялық зерттеулер - эзофагогастродуоденоскопия, кольпоскопия бар. Жеке үй-жайда рентген аппараты орнатылған, сондай-ақ пациенттер тредмил-тест пен велоэргометрді қолдана отырып жүктеме сынамаларын тапсыра алады, электрокардиографиядан, ЭКГ холтер мониторингінен, қан қысымының тәуліктік мониторингінен, аудиометриядан өте алады.

Сонымен қатар, ғимаратта мүмкіндігі шектеулі пациенттерге: пандустар, мүгедектер арбасына арналған арнайы көтергіш, лифт, қозғалысты жеңілдететін құрылғылар, тактилді жолдар және Брайль шрифтін қолданатын ақпараттық тақтайшалар секілді медициналық қызмет көрсету үшін барлық жағдайлар жасалған.