Бангладештің сыртқы істер министрі БҰҰ Бас Ассамблеясының жаңа төрағасы болып сайланды
АСТАНА. KAZINFORM — Бангладештің сыртқы істер министрі Халилур Рахман БҰҰ Бас Ассамблеясының жаңа төрағасы болып сайланды. Ол өз міндеттерін қыркүйек айынан бастап атқарады. Министр бұл қызметте Германияның бұрынғы сыртқы істер министрі Анналена Бербокты алмастырады, деп хабарлайды BILD.
Шешім Біріккен Ұлттар Ұйымына мүше мемлекеттердің дауыс беруі арқылы қабылданды. 72 жастағы Халилур Рахманның кандидатурасын 193 елдің 99-ы қолдады.
Қыркүйек айына дейін БҰҰ Бас Ассамблеясын Анналена Бербок басқара береді, содан кейін ресми түрде өкілеттіктерді тапсыру рәсімі өтеді.
Бас Ассамблея төрағасы лауазымы негізінен өкілдік сипатқа ие болғанымен, оның иесі БҰҰ-ның ең ірі органының жұмысын үйлестіруге қатысып, халықаралық маңызды мәселелерді талқылауға ықпал ете алады.
Бас Ассамблея қабылдайтын резолюциялар міндетті күшке ие емес, бірақ олар әлем елдерінің басым көпшілігінің ұстанымын көрсетеді.
Халилур Рахман ұйым үшін күрделі кезеңде қызметіне кіріседі. БҰҰ әлемнің түрлі аймақтарындағы қарулы қақтығыстардың салдарымен бетпе-бет келіп отыр, сондай-ақ қаржылық қиындықтарға да ұшырады.
Сайланғаннан кейін Рахман БҰҰ-ның бітімгершілік операцияларын реформалауға, әйелдер мен қыздарды қолдау көрсету арнасын кеңейтуге және дамушы елдерге көмекті арттыруға басымдық беретінін айтты.
Бұған дейін дипломаттар арасында оның Бангладештің сыртқы істер министрі қызметін сақтап қала ма деген мәселе талқыланған еді. Рахман бұл қызметке толықтай назар аударуды жоспарлап отырғанын атап өтті.
Айта кетейік, Қырғызстан алғаш рет БҰҰ Қауіпсіздік Кеңесінің мүшесі болып сайланды.
