Бас бапкер Ю.Красножан: Футболдан әлем чемпионатының іріктеуінде Қазақстан өте мықты топқа түсіп отыр
Оның қорытындысы бойынша Қазақстан құрамасы Румыния, Польша, Дания, Черногория және Армения құрамаларымен бір топқа түсті. Жеребе қорытындысына орай футболдан Қазақстан Ұлттық құрамасының бас бапкері Юрий Красножан өз пікірін білдірген. Бұл туралы Қазақстан Футбол федерациясының баспасөз қызметінен хабарланды.
«Команда жетістікке жетуі үшін негізгі рөлді жеребе анықтамайды. Жеребе қорытындысы ерте анықталатыны жақсы. Іріктеу турнирінің басталуына дейін қарсыластар белгілі болады. Уақыт жоғалтпай, дайындықты жақсы жүргізу маңызды. Біздің топтағы қарсыластардың деңгейі бірдей. Атақты команда жоқ, алайда топқа кіл мықты құрамалар түсті», дейді Ю.Красножан.
Оның айтуынша, 2016 жылғы Еуропа чемпионатының іріктеу турниріне қарасақ, Польша мен Румыния өз топтарында бірінші орында тұр. Дания тобында екінші сатыда келеді.
«Сол себепті ойындар оңай болмайды. Ең бастысы жеребе тасталды, әрі қарай жұмыс істеу керек», - дейді Юрий Красножан.
Еске сала кетейік, жеребе қорытындысы мынадай болды: "А" тобы - Люксембург, Беларусь, Болгария, Швеция, Франция, Нидерланд; "В" тобы - Фарер аралдары, Латвия, Андорра, Венгрия, Швейцария, Португалия; "С" тобы - Сан-Марино, Әзербайжан, Норвегия, Солтүстік Ирландия, Чехия, Германия; "D" тобы - Грузия, Молдова, Ирландия, Сербия, Австрия, Уэльс; "Е" тобы - Қазақстан, Армения, Черногория, Польша, Дания, Румыния; "F" тобы - Мальта, Литва, Словения, Шотландия, Словакия, Англия; "G" тобы - Лихтштейн, Македония, Израиль, Албания, Италия, Испания; "Н" тобы - Кипр, Эстония, Грекия, Босния және Герцеговина, Бельгия; "І" тобы - Финляндия, Түркия, Украина, Исландия, Хорватия.